Бүгүн, 11-июль саат 13.00гө карата Ички иштер министрлигине добуш берүүдөгү мыйзам бузуулар боюнча 40 маалымат түштү. Бул тууралуу ИИМдин тергөө кызматынын башчысы Султан Макилов брифингде кабарлады.

Токмок аймактык шайлоо комиссиясынын төрайымы Жылдыз Молдогазиева шайлоо боюнча учурдагы абал тууралуу маалымат берди.

Бишкек аймактык шайлоо комиссиясынын төрагасы Айбек Стамов маалымат жыйын учурунда шайлоо тилкелериндеги мыйзам бузуулар туурасында айтып берди.

Кыргызстанга бүгүн, 11-июлда коронавируска каршы Sinopharm вакцинасынын кезектеги партиясы алынып келди. Вакцинаны өткөрүп берүү иш-чарасына министрлер кабинетинин төрагасы Улукбек Марипов, Кытайдын Кыргызстандагы элчиси Ду Дэвэнь, Кыргызстандын саламаттык сактоо жана социалдык өнүктүрүү министри Алымкадыр Бейшеналиев катышты.

Бишкек, Ош жана Токмок шаардык кеңештерине депутаттарды кайра шайлоо маалында добуш сатып алуу боюнча 11, шайлоочуларды ташуу боюнча 3, үгүт иштеринин бузулушу боюнча 3 факты катталды. Бул тууралуу маалымат жыйында ИИМдин тергөө кызматынын тергөө бөлүмүнүн башчысы Султан Макилов билдирди.

Бишкек - Торугарт унаа жолунун 128-чакырымында (Боом капчыгайы) балдарды ташып келе жаткан автобустардын катышуусунда жол кырсыгы катталды.

Баткен облусундагы мамлекеттик чек аранын кыргыз-тажик тилкеси туруктуу деп бааланууда. Бул тууралуу УКМКнын Чек ара кызматынын коомчулук жана ЖМКлар менен байланыш бөлүмү билдирди.