Кыргыз Республикасынын Билим берүү жана илим министрлигинин жана Саламаттык сактоо жана социалдык өнүгүү министрлигинин көмөгү, Дүйнөлүк саламаттык сактоо уюмунун Европалык чөлкөмдүк бюросунун колдоосу менен уюштурулган “Никотинсиз жана тамекисиз мектеп” сынагынын жыйынтыгы чыгарылды. Бул тууралуу Билим берүү министрлигинин басма сөз кызматынан кабарлашты.

Уюштуруучулардын айтымында, пилоттук программаны жайылтуу үчүн төмөндөгү мектептер тандалып алынган:

1. Чүй облусунун Сокулук районунун Жал айылындагы Рустамбек Мамыралиев атындагы мектеп-гимназия;

2. Бишкек шаарындагы Райкан Шүкүрбеков атындагы №38 мектеп-гимназия;

3. Бишкек шаарындагы №74 мектеп-гимназия;

4. Нарын шаарындагы Арстанбек Буйлаш уулу атындагы №8 орто мектеп.

Мектеп окуучулары арасында тамекинин зыяны тууралуу мыкты сүрөттөргө сынак жарыяланган. Ага 6-класстан 11-класска чейинки окуучулар катышкан. Ар бир мектепте саламаттык бурчтары уюштурулуп, ал жерлерде окуучулардын сүрөттөрү илинген. Дээрлик бардык сүрөттөрдө тамекинин зыяны, кесепеттери тууралуу ички туюм жана тамекисиз жашоого карай жолду тандоо чагылдырылган.

Пилоттук мектептердин бардыгында 6-класстан 11-класска чейинки окуучулар арасында сурамжылоо жүргүзүлгөн. Ага 3 830 окуучу катышкан.

Сынакка жигердүү катышкан мектептерге Samsung фирмасынын түстүү телевизору, ал эми жеңүүчү деп табылган окуучуларга Power Bank белек кылынды.