Уфада өтүп жаткан өспүрүмдөр арасында спорттук күрөш (грэпплинг) боюнча дүйнө чемпионатында Нурсултан Куштарбек уулу алтын медалды багындырды. Нурсултан кадеттер арасында 63 кг салмакта беттешке чыкты. Ал эми юниорлор арасында 58 кг салмак категориясында күч сынашкан Нурсултан Арзыматов коло медалга ээ болду. Чемпионатка грепплинг боюнча Кыргызстандын атынан жалпы жети спортчу катышты.

Эскетсе кетсек, 11-августта башталган мелдеш 23-августка чейин уланат.

Мелдешке 65 өлкөдөн 1500дөн ашуун балбандар катышып жатат. Спортчулардын жашы 21 жашка чейин. Мелдеш үч дисциплина боюнча өтөт: 13-15-августка чейин - грэпплинг боюнча, ал эми 16-августтан 22-августка чейин - грек-рим жана эркин күрөш боюнча өтөт.

Белгилей кетсек, күрөш боюнча өспүрүмдөр арасындагы дүйнө чемпионаты биринчи жолу Орусияда өтөт. Аны Уфада өткөрүү чечими 2019 -жылдын сентябрь айында Казакстанда өткөн UWW (United World Wrestling) конгрессинде кабыл алынган.